Osisi Ego N’Ala Igbo

Résumé

Nchọcha a bụ maka osisi na-enye ndị Igbo akatamkpo ego. Osisi bụ otu n’ime ihe Chineke kere nye mmadụ iji mee ka ndụ tọọ ụtọ ma na-aga nke ọma. Ebe osisi ego bụ osisi ndị ahụ dị iche iche na-enye ndị Igbo atakamkpo ego. Ihe kpalitere mmụọ nwanchọcha ime nchọcha a bụ ime ka ndị mmadụ mata mkpa na uru dị iche iche osisi bara n’ala Igbo. Ugwu na nsọpụrụ osisi ụfọdụ nwere nke ọtụtụ ụmụafọ Igbo amabeghị ruo taa n’ihi akụnaụba e si na ya eweta. Nwanchọcha ahụbeghị onye merela nchọcha iji chọpụta osisi ndị ahụ. Ihe nwanchọcha bu n’obi bụ ịchọpụtagasị aha osisi ndị ahụ naenye ndị Igbo nnukwu ego n’ụzọ dị iche iche ma detuo ha n’akwụkwọ. Ebumnobi nwanchọcha ọzọ bụ ime ka anya ụmụafọ Igbo meghee site n’ịmata osisi ụfọdụ bụ osisi ego ha na-ahụ kwa mgbe ma ha amaghị na ọ bụ nnukwu osisi n’ala Igbo. Atụtụ mgbakwasa ụkwụ nchọcha a bụ atụtụ njirieme na atụtụ nrụgaara aka. Nchọcha a gosịrị na ụfọdụ osisi e nwere n’ala Igbo nwere ndị na-enye atakamkpo ego n’ụzọ dị iche iche. Ọzọ, nwanchọcha chọpụtara na osisi ndị a abụghị ihe ndị Igbo ji egwuri egwu n’ihi ihe nnweta dị na ha. Osisi ego ndị a bụ osisi ndị Igbo chekwubere maka ihe nnweta dị ka ego, nri, akwa, ebe obibi, ọnọdụ ahụ ike dg. Nwanchọcha chọpụtara na dị ka ọnụọgụ ụwa na-abawanye ka ọkụkụ na ọzụzụ osisi ego ndị a na-abawanyekwa. A chọpụtara na osisi ụfọdụ nwere ugwu na nsọpụrụ pụrụ iche n’ala Igbo karịa ibe ha. Nchọcha a bụ nchọcha nkọwasị na nkọwami. Ebe nwanchọcha siri weta ngwa nchọcha ya bụ n’akwụkwọ ọgụgụ dị iche iche, ajụjụ ọnụ ọ gbara ndị maara ihe ekwe na-akụ n’ebe osisi dị n’ala Igbo. N’ikpeazụ, nwanchọcha mejupụtara ebumnoobi ya site n’ime ka ụmụafọ Igbo mata na osisi e nwere n’ala Igbo dị n’ụdị dị iche iche.